Stres insanların yalnız işgüzar deyil, gündəlik həyatının da ayrılmaz bir parçasıdır. İnkişaf edən, dəyişən və hər gün bir az da qarışıq hala gələn yaşam şərtlərinə uyğunlaşmağa çalışarkən insanlar streslə qarşı-qarşıya gəlir və qarşılaşdıqları stresin təsirindən çıxmaqda çətinlik çəkirlər. Gündəlik həyatda məruz qaldığı stres insanın həm fiziki, emosional, davranış çətinlikləri yaşamasına, həm də qalıcı xəstəliklərə tutulmasına şərait yaradır. Stressiz yaşam mümkün olmadığı üçün stresin idarə edilməsi, nə məna kəsb etdiyi, necə yarandığı, əlamətləri və nəticələri barədə məlumatlanmaq, streslə mübarizə aparmaq üçün nələr edə biləcəyini öyrənmək çox önəmlidir. Çünki təsirli bir stres idarəetmə üsulu insanın fiziki və mənəvi balansı qorumasına kömək edir, problem həll etmə və qərar qəbuletmə bacarıqlarının, həmçinin gündəlik həyatında məhsuldarlığın artmasına şərait yaradır.